HaNo berga poeng på overtid
|
Det vart ein målrik kamp då HaNo møtte nabo Harøy på Nordøy-graset søndag under HaNo-dagane. Etter 1 – 1 ved halvtid kom det seks mål etter pause. Tre mål til kvart lag. Og to av måla kom på overtid.
|
4. divisjon:
HaNo berga poeng på overtid
HaNo – Harøy: 4 – 4 (1– 1)
Nordøy gras
350 tilskuarar
Mål:
0 – 1 Adrian Nilsen ( 30 min)
1 – 1 Vegard Halkjelsvik ( 42 min)
1 – 2 Stian Myklebust ( 52 min)
1 – 3 Stian Harnes ( 72 min)
2 – 3 Per Jarle Fjørtoft ( 73 min)
3 – 3 Lars Petter Haram ( 87 min)
3 – 4 Stian Harnes ( 90 min)
4 – 4 Kenneth Ulla ( 90 + 3 min)
Dommar : Ernst Myre, Spjelkavik
Gule kort : Jan Egil Ulla, HaNo og Nicolay Brunvoll, Harøy
Dagens HaNo: Jan Egil Ulla
Laget:
Henrik Åkre, Kristian Kalvøy, Michael Austnes, Kenneth Ulla, Vegard Halkjelsvik, Åge Ulla, Lars Petter Haram. Cato Longva, Asgeir Nogva, Jan Egil Ulla og Per Jarle Fjørtoft
Innhopp: Stig Frode Longva, Dag Peter Olsen, Kent Inge Klokk og Per Kristian Klokk
Tekst og foto: Gunnar Standal
Alle trudde gjestane hadde sikra sigeren då Stian Harnes skaffa leiing i sluttsekunda. Men dommar Myre la til fire minutt. HaNo og Kenneth Ulla brukte tida godt og utlika før dommaren bles av.
Alt i alt eit greitt resultat. HaNo gav inntrykk av å vere det mest spelande laget og burde ha avgjort kampen med full innsats i begge endar av bana. Men i staden var det gjestane som viste mest innsats i dei avgjerande situasjonane. Finspel var det lite av, men viljen til å omgjere sjansar til mål, var stor. Og i fotball er det måla som tel, ikkje stilkarakteren.
HaNo opna best og hadde full kontroll. Første sjansen fekk HaNo sin bestemann, Jan Egil Ulla, men gode Arve Myklebust i gjestemålet slo ballen ut. Deretter nikka Per Jarle Fjørtoft eit hjørnespark utanfor. Etter halvtimen fekk gjestane sin første sjanse. Adrian Nilsen fekk gå nærast uhindra gjennom eit passivt forsvar og skaut lavt forbi Henrik Åkre. Vegard Halkjelsvik skaffa balanse ved halvtid då eit langt frispark gjekk forbi alle og i mål bak ein overraska Arve Myklebust.
Første halvtimen av andre omgong nytta gjestane til å skåre to mål. Først fanga Stian Myklebust ein retur etter hjørnespark og skaut lavt i mål. Så spela Harøy seg fint gjennom på HaNo si høgreside, og innlegget kjempa gode Stian Harnes i mål. Godt gjort! Men sjølv om gjestane var effektive, var HaNo heile tida det førande laget. Først reduserte Per Jarle Fjørtoft, og Lars Petter Haram skaffa uavgjort då han nikka eit presist hjørnespark frå Vegard Halkjelsvik kontant i nota. Dommar Myre la til fire minutt etter skadar og stopp i spelet. Første minuttet nytta gjestane og Stian Harnes til å ta leiinga att. Harnes kjempe seg gjennom eit passivt forsvar på vestrekanten og skaut lavt i mål bak ein fortvila Henrik Åkre. Skulle det bli tap? HaNo satsa alt framover. Først stoppa gode Myklebust eit godt forsøk frå Lars Peter Haram etter legg frå Asgeir Nogva, men Kenneth Ulla sitt harde skot etter litt fram og tilbake i feltet, var han sjanselaus på. Dermed enda kampen uavgjort. Fotball er eit underleg spel!
Dommar Myre dømde godt.
Gunnar Standal
|