Tapte på overtid
|
HaLe-Sunnylven 1-2
- Denne er vanskeleg å svelgje. Vi hadde full kontroll i 92 minutt, men dessverre blir det ikkje poeng, meinte trenar Kenneth Ulla om HaNo/Lepsøy (HaLe) sitt tapre forsøk på siger mot Sunnylven. Øylaget produserte nok til å vinne, men som vanleg var det storskårar Kirsti Frøysadal som fekk siste ordet.
|
3. div kvinner, 26.06.11, Nordøy stadion.
Kampfakta:
HaNo/Lepsøy-Sunnylven IL 1-2
Mål:
1-0 Lillian Kjerstad (1-0)
1-1 Anniken Hjelbakk Hole (41)
1-2 Kirsti Frøysadal (90+2)
Dommar: Odd Grande, Skodje – Full kontroll på kampen.
Dagens HaLe-spelar: Lise T. Fjørtoft.
Frøysadal er dama ein må stoppe for å slå Sunnylven. Det gjorde dei gode heimeforsvarane og målvakt Hanna Sylte heilt til matchuret til Tryggve Rogne hadde bikka 47 spelte minutt i andre omgang. Då var ho nådelaus, og sikra sigeren for bortelaget.
Mykje godt spel
HaLe hadde trykket før pause, noko 9 hjørnespark kan vere eit godt bilete på. Midtbana vann duellane, og forsvaret spelte samla og godt. Vi noterte kun to bortemålsjansar denne omgangen. HaLe spelte med gode kombinasjonar, der 1-0 målet var festfotball. Silje Vindsnes Haram kombinerte med Martha Kjerstad og Lise Fjørtoft, før ho la inn til Lillian Kjerstad som tok heimelaget i leiing. Lillian var nær å skåre på volley etter Britt Tove Molnes- innlegg, men i staden er det bortelaget som svarar på eit skot frå 20 meter. 1-1 til pause, som kunne blitt 2-1 ved Trude Haram på hovudet, men den gjekk over. Innlegget frå Eli Rogne var godt!
Jamn andreomgang
Etter pause var det meir strekk i laga, og det opna seg meir opp. Lillian hadde nye mulegheiter til å skåre. Stikkpasninga frå spisspartner Cecilie Kalvøy var det klasse over, men Lillian blei for ubesluttsom både på den og på to andre sjansar utover omgangen. Det vart etter kvart stor nerve i kampen, som begge lag hadde lyst å avgjere. Men to gode forsvar hindra skåringane såg det ut til. Altså heilt til bortelaget vann ballen på midten på overtid, kontra og avslutta i fin boge forbi keeper. – Det var nesten unødvendig. Eitt poeng til kvar hadde vore mest rettferdig, vedgjekk den sympatiske Sunnylven-trenaren etter kampslutt.
HaLe:
Hanna Sylte
Eli Rogne
Tone Elise Austnes
Ingrid Farstad
Martha Kjerstad
Cecilie Kalvøy
Lise T. Fjørtoft
Britt Tove V. Molnes
Silje V Haram
Trude Haram
Lillian Kjerstad
Nytta innbyttarar: Anna Longva og Seline Hoedemakers.
|