|
HaNo tapte mot Lepsøy
|
Laurdag var det ganske nøyaktig 21 år sidan sist HaNo og Lepsøy møttest i same divisjon til kamp om poeng. I 1988 på Austnes vann gjestane 3 – 1. Kenneth Ulla skåra HaNo sitt mål då, og laurdag var han berre millimeter frå å avgjere kampen for HaNo. I staden var det Lepsøy og Geir Seth som lykkast i sluttminutta og vann det spanande oppgjeret.
|
4. divisjon:
HaNo tapte mot Lepsøy
HaNo – Lepsøy: 3 - 4 (3– 1)
Nordøy gras
85 tilskuarar
Mål: 1 – 0 Lars Petter Haram ( 02 min)
2 – 0 Stig Frode Longva ( 32 min)
2 – 1 Alex Eide ( 37 min)
3 – 1 Cato Longva ( 45 min)
3 - 2 Alex Eide ( 55 min)
3 – 3 Geir Seth ( 65 min)
3 – 4 Geir Seth ( 85 min)
Dommar : Oddbjørn Hatlehol, Brattvåg
Gule kort : Kenneth Ulla, HaNo og Marius Eide, Lepsøy
Dei elleve utvalde:
Lasse Buck, Jonas Longva, Michael Austnes, Kenneth Ulla, Kristian Kalvøy, Vebjørn Steen, Lars Petter Haram, Cato Longva, Vegard Halkjelsvik, Jan Egil Ulla og Stig Frode Longva
Desse gjorde sprelske innhopp frå benken:
Åge Flem Ulla, Per Jarle Fjørtoft, Dag Peter Olsen, Kent Inge Klokk og Odd Einar Molnes
Laurdag var det ganske nøyaktig 21 år sidan sist HaNo og Lepsøy møttest i same divisjon til kamp om poeng. I 1988 på Austnes vann gjestane 3 – 1. Kenneth Ulla skåra HaNo sitt mål då, og laurdag var han berre millimeter frå å avgjere kampen for HaNo. I staden var det Lepsøy og Geir Seth som lykkast i sluttminutta og vann det spanande oppgjeret.
Kampen vart aldri velspelt. Det var sjeldan å sjå at ballen var innom same laget i meir enn tre trekk. Ein del av skulda får vind og væte ta, men Nordøy-bana er svært jamn og god. Likevel fekk HaNo draumestart med leiing etter to minutt. Kenneth Ulla nådde høgst på eit hjørnespark, og returen frå målvakt Bjørnar Seth skaut Lars Petter Haram sikkert i mål. Og det var HaNo som skapte sjansane. Målvakt Seth måtte gi retur på eit innlegg frå Bror Vebjørn Steen, og Stig Frode Longva var påpasseleg frampå. Men gode og aktive Alex Eide skaut gjestane inn i kampen att då han lurte både Kenneth Ulla og målvakt Lasse Buch før han skat ballen i tomt mål. Svært godt gjort! Pauseresultatet fastesette Cato Longva då han skaut eit innlegg frå Vegard Halkjelsvik i mål. Med leiing 3 – 1 ved halvtid og vinden i ryggen verka det som om HaNo skulle få revansje for tapet 21 år tidlegare.
Men Lepsøy ville ikkje tape denne kampen. Rutinerte og sterke Martin Farstad og Geir Seth vann dei fleste duellane på midtbana, og framme var Alex Eide ein stadig trussel med fart og vilje til å gå på mål. 2 – 3 blei det då Buch måtte gi ein retur etter eit innlegg frå Thomas Ivar Farstad og gode Eide skåra påpasseleg nummer to. Utlikninga kom ved Geir Seth etter eit frispark som Eide fekk kontroll på i feltet. No stod kampen og vippa. HaNo la om og sette Kenneth Ulla fram. To gonger fekk han sjansen til å skåre, men begge gongane redda Bjørnar Seth flott med fotparadar. I staden viste Lepsøy effektivitet og innsatsvilje. Junior da Silva fekk kontroll på høgrekanten, slo tilbake til Geir Seth som fekk god tid til å sikte før han knalla sigersmålet i nettaket.
Dermed gjekk HaNo på det første tapet for sesongen. Og spelarane har berre seg sjølve å skulde på. Alt låg til rette for tre nye poeng, men Lepsøy viste seg som eit sterkare lag enn HaNo denne gongen. Gjestane ville mest i andre omgong, og viljen gav fortente resultat. HaNo slit med skadar på nøkkelspelarar. Både LP og Per Jarle slit med strekkskadar og måtte ut ved halvtid. Laget er ujamt og litt for mange spelarar viste ikkje nok kampglød og vinnarvilje. Vilje til å ta seg ut, til å yte ekstra, avgjer gjerne jamne oppgjer. Det tel ikkje at HaNo hadde flest nesten-situasjonar. Det siste ekstra var det gjestane som hadde.
Dommar Hatlehol dømde greitt.
Gunnar Standal
|
