|
Ny siger for herrelaget
|
Herrelaget vann 3-1 borte mot Emblem på ei snødekt kunstgrasbane på Emblem. Cato Longva skåra 2 og Per Kristian Klokk 1 mål. HaNo leia 1-0 til pause. No med kampref.
|
Siger på godt vinterføre
Emblem IL hadde trass i skikkeleg vintervér ei høgst spelbar bane på plass til treningskampoppgjeret mellom 5. divisjonsklubbane Emblem og HaNo. Emblem starta best, men HaNo vann i ein kamp som var ganske så jamn.
10.02.10, Emblem stadion.
Kampfakta:
Emblem-HaNo 1-3 (0-1)
Mål:
0-1 Per Kristian Klokk (38)
0-2 Cato Longva (49)
1-2 (Str. 60)
1-3 Cato Longva (83)
Emblem trilla ball i store delar av 1. omgang, medan HaNo ikkje hang med før godt og vel halve omgangen var spelt. Cato Longva advara heimelaget etter ca 20 minutt, men berre lauskrut (eller evt laus-snø) denne gongen. For det var Emblem som kunne og burde leia etter denne perioden. To headingar frå kort hald spesielt, burde gitt resultat. HaNo rydda unna, og anført av midtbanesentralane Åge Flem Ulla og Lars Petter Haram kom HaNo med i oppgjeret spelemessig att. HaNo tok leiinga litt før pause. – Ferdigskåra, sa Per Kristian Klokk om nettkjenninga si, og takka dermed Åge for ein skikkeleg grovjobb først i feltet etter eit glitrande slått hjørnespark frå Vegard Halkjelsvik.
Emblem IL hadde gjort i stand ei kjempegod bane véret tatt i betraktning. Traktoren gjekk heilt inntil kampstart, og også i pausen nytta ein høve til å kjapt og effektivt måke vekk snøen frå bana. Den hadde vore grøn til kampstart 2. omgang, hadde det ikkje vore for at dommar Bjermeland verka å ha svært dårleg tid denne onsdagskvelden. Av ukjent årsak let han ikkje traktoren få sine to minutt til for å måke heile bana. Slik sett blei 2. omgang litt meir snøfylt enn strengt tatt naudsynt. HaNo-spelarane kan på si side ta på eiga kappe at over halvparten av oss ikkje var særleg godt skodd til oppgjeret. Som rutinerte Jan Egil hevda; det skada ikkje å ha med seg eit ekstra par knottesko i bagen til slike kampar…
HaNo brukte likevel ikkje lang tid på å gå opp i tomålsleiing. Cato skåra sitt 5. mål på 3 treningskampar, etter flott forarbeid av Jan Egil. Emblem fekk tildelt straffespark kvarteret ut i omgangen. Dermed 1-2, og HaNo opptredde no litt meir usikker i alle spelets fasar. Då var det godt å få 1-3 etter 83 minutt. Igjen gjennom kombinasjonen Jan Egil/Cato. Sistnemnde kom åleine med målvakta, passerte han og plasserte ballen trygt i mål. Det kunne blitt 1-4 også på ein Kristian Furnes-dødball som LP la nydeleg att til Michael Austnes, men headinga gjekk rett utanfor.
Ein bra spelemessig kamp av HaNo den siste timen av kampen. Positivt å sleppe inn berre eitt mål. Forsvaret arbeidde godt, og Henrik Åkre i målet var våken gjennom heile kampen og kommuniserte godt med dei framom seg.
HaNo (4-4-2):
Henrik Åkre- Kristian Kalvøy, Kristian Furnes, Per Kristian Klokk, Demir Haram- Odd Einar Molnes, Åge Flem Ulla, Lars Petter Haram, Vegard Halkjelsvik – Jan Egil Ulla, Cato Longva
Nytta innbyttarar: Michael Austnes, Øyvind Risan, Eivind Fugledal, Dag Peter Olsen, Steven Haram.
|
