|
Kampref Hessa-HaNo:
|
Hessa eit nummer for store. Tor Gunnar Standal følgde Hessa-HaNo på onsdag. Den enda som kjent med klart tap. Her er referat og kampfakta.
|
5. div
Hessa – HaNo 5-1 (3-1)
Hessa kunstgress
1-0 Ramsy Suleiman (12)
2-0 Endre Pickart (24)
3-0 Nils Ottar Sandø (32)
3-1 Åge Flem Ulla (45)
4-1 Ramsy Suleiman (76)
5-1 Nils Ottar Sandø (78)
Dommar: Magne Jonny Krumsvik, Volda TIL
Stjerner HaNo:
*** Åge Flem Ulla
** Henrik Åkre
* Michael Austnes
Onsdag møtte HaNo hardtsatsande Hessa på bortebane. HaNo sesongopna med tre poeng heime mot øyakollega Lepsøy i første kampen. Hessa på si side er attende i seniorfotballen for første gong på tolv sesongar og har fått med seg fleire lokale spelarar med erfaring frå høgt nivå. Til tross for eit sviande 8-1 tap mot Harøy i første kampen vert dei av mange rekna som ein av favorittane til opprykk. \"Eg er veldig spent på Hessa-laget, men om vi får opp vår aggressivitet har eg tru på at vi kan kjempe og springe dei i senk\", sa ein spent HaNo-trenar Odd Einar Molnes før kampen.
Men det var Hessa som hadde størst aggressivitet og kom best i gong, og berre ein opplagt Henrik Åkre i HaNo-buret hindra tidleg Hessa-leiing. Etter omlag ti minutt fekk HaNo sin første sjanse, eit straffespark ut av det blå då ein Hessa-forsvarar var uheldig og nytta handa i eige straffefelt. Lars Petter Haram sette straffa i stonga, og det etterfølgjande kråsparket enda i ingenting. I staden for HaNo-leiing var det Hessa som like etterpå gjekk opp til 1-0. Hessa fortsette å skape sjansar, og HaNo hadde sine beste forsøk på dødballar. Etter omlag halvtimen var det klart for to kjappe Hessa-skåringar. Først på eit skot frå Pickart etter at rutinerte Nils Ottar Sandø kom rundt på kanten, og like etterpå la Sandø sjølv på til tre då han sprang i gjennom i midten. Etter dette tok HaNo tak i duellane og kom betre med i kampen. Det var difor ikkje ufortent at Åge Flem Ulla kunne redusere til 3-1 like før pause med eit flott skot frå omlag tjue meter.
Etter pause var HaNo langt meir med i kampen enn i første omgang. Hessa var heile tida småfarlege og prøvde seg med nokre langskot utan å treffe mål, medan HaNo prøvde seg med kontringar og dødballar. Etter vel 50 minutt hadde Lars Petter Haram sjansen til å redusere ytterlegare, men headinga frå kort hald gjekk over tverrstonga. Åge Flem Ulla heldt på å skåre sitt andre for dagen, men Hessa-målmannen fekk slått skotet til kråspark. Også Cato Longva hadde sjansen til å redusere, men avslutninga vart for dårleg. I staden for redusering og ny spenning var det Hessa som avgjorde kampen med to nye kjappe mål. Først var det Ramsy Suleiman som stonga inn 4-1, før Sandø punkterte kampen med nok eit gjennomløp.
Etter dette hadde Hessa full kontroll og tok tre fortjente poeng i sin første heimekamp på tolv år. Hessa sine rutinerte karar med Nils Ottar Sandø og Marius Aam i spissen kjem nok til å plukke mykje poeng på heimebane i år - så vil tida vise korleis laget taklar bortekampar med reising og humpete grasbaner.
Ein noko tynn HaNo-stall må sjå fram mot neste kamp, heime mot Harøy. Etter kampen oppsummerte trenar Molnes det slik: \"Vi møtte eit betre lag og tapte fortjent. Vi hadde ein positiv slutt på førsteomgangen og start på andreomgangen, men vi skapte for lite sjansar til å kunne hente dei opp. Vi må og jobbe med å forbetre spelehumøret vårt til neste kamp.\"
HaNo:
Henrik Åkre-Kristian Kalvøy, Michael Austnes, Per Kristian Klokk, Demir Haram- Vegard Halkjelsvik, Lars Petter Haram, Åge Flem Ulla, Asgeir Nogva- Cato Longva, Stig Frode Longva
Nytta innbyttarar: Odd Einar Molnes, Øyvind Risan, Steven Haram
|
