|
Herrelaget slo Giske
|
Giske-HaNo 2-4. Lars Petter Haram, Michael Austnes og Cato Longva tok HaNo opp i 3-0 leiing før pause. Cato auka til 4, før Giske kom meir med mot slutten og reduserte to gongar. No med referat og bilete
|
Tre poeng mot Giske
5. div
Giske – HaNo 2-4 (0-3)
Giske Stadion
0-1 Lars Petter Haram (26)
0-2 Michael Austnes (35)
0-3 Cato Longva (39)
0-4 Cato Longva (62)
1-4 Anders Veddegjerde (straffe - 70)
2-4 Ein Giskespelar (78)
Dommar: ,
Stjerner HaNo:
* Asgeir Nogva
** Åge Flem Ulla
*** Jonas Longva
Onsdag var HaNo sitt herrelag på øya-vitjing på Giske Stadion. Etter siger heime mot Stranda2 i helga var det eit HaNo-lag med favorittstempel som møtte eit ungt Giske-lag som berre har ein siger hittil i sesongen, og det skulle syne seg at HaNo-spelarane takla presset som eit favorittstempel ofte etterlet seg.
Av: Tor Gunnar Standal
HaNo kom best i gong i solskinet på Giske og styrte kampen i heile førsteomgangen. Likevel vart det lite store sjansar det første kvarteret, då den siste pasninga mangla presisjon, noko som den ujamne bana må ta ein del av skulda for. I ein 4-3-3 formasjon spelte HaNo seg til den eine innleggsmuligheita etter den andre, men enten vart innlegget for upresist, eller så vart avslutninga for svak. Høgdepunktet for mange det første kvarteret var nok då Michael påpeika til Kenneth H på sidelina at den nyaste DOF-båten passerte sørover på Valderhaugfjorden.
Både Cato og Asgeir hadde sjansen til å gi HaNo leiinga, men det var Lars Petter som ordna velfortent leiing då han stonga eit kråspark sikkert i mål. Og etter dette losna det litt for HaNo. Først hadde Odd Einar sjansen til å auke, men avslutninga åleine med keeper gjekk utanfor. Like etter la Michael på til 0-2 då han raga høgast i feltet etter eit kråspark frå Vegard. Deretter var det Cato som fekk æra av å skåre dagens finaste, då han vart vakkert frispelt av Åge og putta sikkert åleine med keeper. To minutt før pause hadde Giske dagens første skot på mål, men det skapte ikkje dei store vanskane for Henrik. Omgangen vart avslutta med fleire store HaNo-sjansar, men Giske-keeperen og tverrstolpen hindra større HaNo-leiing til pause.
Andre omgang opna omlag slik som den første avslutta. Etter at både Cato, Lars Petter og Asgeir hadde store sjansar til å auke leiinga var det fortjent då Cato skåra sitt andre for dagen, nok ein gong etter fint forarbeid frå Åge. Etter dette opna kampen seg opp, og Giske kom meir med i spelet. HaNo var farlege på kontringar, og særleg Jonas på høgrebacken var aktiv og på konstant løp på høgresida, og skapte fleire gode muligheiter ved fikse kombinasjonar. Jonas skal vere med resten av vårsesongen og synte seg som ei god forsterkning på Giske. Men Giske si første redusering kom etter at ballen spratt opp i handa til Jonas. Kampen sin gode dommar meinte at handa var i ein «unaturlig posisjon», og frå 11-metermerket gjorde rutinerte Anders Veddegjerde ingen feil.
Etter dette hadde HaNo fleire store sjansar til å auke leiinga, men i staden var det Giske som nok ein gong kunne redusere då dei utnytta ein uryddig bakre firer hjå HaNo. Både Cato og Stig Frode hadde sjansar til å auke sigeren, men kampen ebba etter kvart ut med ein fortjent 4-2 siger til HaNo. Etter kampen var trenar Odd Einar godt nøgd med at laget fungerte fint i sin 4-3-3 formasjon, men litt skuffa over at det ikkje vart fleire HaNo-mål. Og han var og nøgd med å ha Jonas attende i laget; «Kjekt å ha ein så offensiv og innsatsvillig back som han var i dag».
HaNo:
Henrik Åkre
Jonas Longva
Michael Austnes
Per Kristian Klokk
Demir Haram
Vegard Halkjelsvik
Lars Petter Haram
Åge Flem Ulla
Odd Einar Molnes
Cato Longva
Asgeir Nogva
Nytta innbytarar:
Stig Frode Longva
Kristian Kalvøy
|
