|
Bergheim berga HaNo
|
2-0 og full pott mot Ørsta for HaNo denne sesongen. La det likevel vere sagt med ein gong: Det var eit av tidenes ran vi var vitne til på Ørsta stadion denne gongen. Men det er måla som tel, og i tillegg til at fru Fortuna var på dei blå si side, så var forsvar-og målvaktspelet av godt kaliber denne gongen.
|
Poengran i Ørsta:
Bergheim berga HaNo
4. divisjon:
Ørsta-HaNo 0-2 (0-2)
Mål:
0-1 Sondre Steen (14)
0-2 Stig Frode Longva (42)
Dommar: Steinar Hjelle, Sunnylven.
Juryens dom:
3 poeng: Michael Austnes
2 poeng: Øystein Bergheim
1 poeng: Kenneth Ulla
I tillegg skal ein gi ros til angriparane som skåra to mål på berre fire målsjansar. Ørsta opna best med fleire halvsjansar, men det var HaNo som tok leiinga. Eit langt innkast blir stussa bak i feltet, og Sondre Steen plasserer ballen sikkert forbi målvakta. Akkurat den opninga HaNo trengte.
Måla som tel…
Ørsta slo langt mot Hallgeir Aam, dei greidde å bruke kantane, og i starten av første omgang herja heimelaget spelemessig med HaNo. Men ingenting resulterte i skåringar. Treverket redda HaNo ein gong, medan Øystein Bergheim avverga G16-landslagsspelar Espen Standal sitt forsøk på glimrande vis. Aam og Standal fekk nye store sjansar, men blei etter kvart meir frustrerte. Michael Austnes vann om lag samtlige duellar mot Aam den siste timen av kampen. I staden for heimeleiing gjer HaNo sitt andre. Totalt mot spelets gong, men angrepet var flott. Lars Petter Haram går på løp, forserer forbi to mann på venstresida. Legg flott inn til Aleksander Eide, som headar, og Stig Frode Longva er sist på ballen. Tre minutt før pause, eit perfekt tidspunkt for ei ny skåring!
- Min artigaste kamp
Andre omgang opna med at HaNo greidde å halde litt meir i ballen. Men det gjekk ikkje lang tid før vertane festa grepet og det på nytt blei heitt rundt øyrene på Bergheim. I det 7. minutt måtte han igjen gjere ei ypperlig redning. Standal skaut på nytt minuttet etter, men Bergheim stengte buret. HaNo kom så meir med igjen, før Ørsta fyrte i tverrliggaren midt i omgangen. Stig Frode Longva kunne gjort 0-3 på ei kontring, men avslutninga gjekk i nettveggen. Stig Erik Nogva hadde også sjansen å skåre, men skotet gjekk rett utanfor. Ein svært nøgd og letta målvakt Bergheim gjorde ei ny kjemperedning rett før slutt, og oppsummerte slik: - Ein del å gjere i dag ja, men når det endar med tre poeng, så er dette sikkert den artigaste kampen eg har vore med på!
Mistar mange
HaNo får eit relativt tett program framover. Mange spelarar reiste i sommar, og ytterligare tre mann spelte denne kampen før dei reiser attende til studier andre stader i landet eller skiftar klubb. Troppa er minimal, men dette var nok ei viktig vitamininnsprøyting for gjengen som blir att dei siste to månadane av sesongen. Gutespelar Eirik Flem Slyngstad spelte sine første seniorminutt, og gjorde ein god jobb. Heimekampen mot eit formsterkt Ørskog komande torsdag blir neste utfordring for dei blå.
HaNo (4-4-2)
Øystein Bergheim- Preben Lorgen, Michael Austnes, Kenneth Ulla, Vebjørn Steen- Odd Einar Molnes, Cato Longva, Lars Petter Haram, Sondre Steen- Aleksander Eide, Stig Frode Longva.
Nytta innbyttarar: Stig Erik Nogva, Kent Inge Klokk, Eirik Flem Slyngstad.
|
