|
HaNo best i vinden
|
Med vinden i ryggen dominerte HaNo fullstendig før pause. Men klarte berre å skåre ein gong. Etter kvila jamna det seg ut, og det var spenning i kampen heilt fram til kampslutt.
|
5. divisjon
HaNo – Ravn 2-1 (1-0)
Nordøy stadion
40 tilskodarar
1-0 Vegard Halkjelsvik (30)
2-0 Lars Petter Haram (str 90)
2-1 (90 +3)
Dommar: Odd Arne Grande, Skodje
Stjernebørsen HaNo:
*** Jonas Longva
** Vegard Halkjelsvik
* Lars Åkre
HaNo opna kampen forrykande. I løpet av det første kvarteret hadde vi notert 6 store målsjansar. Men ballen ville ikkje i mål. Cato Longva og Michael Austnes var åleine med keeper. Lars Petter Haram lobba like over, Åge Flem Ulla traff både stolpen og tverrliggaren, men altså utan teljande resultat. Men HaNo framstod solid i første omgang. Laget pressa hardt over heile bana, og vann igjen ballen i mange gunstige posisjonar. Ravn på si side hadde store problem med å etablere spel i 1. omgang, og skapte ikkje ein einaste sjanse før pause.
Men HaNo fekk si fortente pauseleiing. Vegard Halkjelsvik slo frispark frå 35 meter. Med vinden i ryggen gjekk ballen gjennom heile feltet og i mål.
- Eg er godt fornøgd med prestasjonen vår i dag, oppsummerte HaNo – trenar Odd Einar Molnes etter kampen. Vi er aggresive, vinn ofte ballen, og det er bra presisjon framover. Med normal utteljing burde vi leda med fleire mål til pause.
Jamnare siste halvdel
Etter pause var det Ravn som hadde nord-vesten i ryggen, og dermed jamna kampen seg ut. Ravn skapte nokre farlegheiter framfor Henrik Åkre i HaNo sitt mål. Nærast var Eivind Ulla med eit skot frå kloss hald, men Åkre var kjapt nede og slo til corner. I motsett ende var både Cato Longva og Kenneth Ulla gjennom utan å lukkast. I det kampen var i ferd med å ebbe ut, skjedde det mykje. Først fekk HaNo straffe då Cato Longva vart skubba i feltet. Lars Petter Haram var sikker frå 11 meter. Like før kampslutt reduserte Ravn etter innlegg. Kampen sett under eitt vart dette ein fortent HaNo – siger. Laget vann sjansestatistikken klart.
- Godt fornøgd med innsatsen i dag, oppsummerte trenar Molnes. Ekstra ros til Vegardg Halkjelsvik som spelte sin beste kamp for året på sentral midtbane.
Neste oppgåve for HaNo er borte mot MSIL onsdag.
|
